Prjónaður hlýrabolur

Hlýrabolurinn er prjónaður í hring á hringprjóna, neðan frá og upp með einföldu netamynstri. Þykka ullargarnið gefur flíkinni fyllingu og mohair garnið léttir hana að ofan. Hægt er að gera pífur að neðan með mohairgarninu eða skipta þeim út fyrir hefðbundið stroff.

Fytjið upp 84 lykkjur (l) á hringprjóna nr 8 með einum þræði af ullargarni. Umferð (umf) 1: Setjið prjónamerki (pm) á meðan prjónað er: pm 1, prjónið slétt (s) 6 (hliðarlykkjur), pm 2, s36, pm 3, s6 (hliðarlykkjur) pm 4, s36. Umf 2: prjónið allar lykkjur s. Umf 3: pm 1, s6, pm 2, *sláið upp á prjóninn, prjónið 2 saman (p2s)*, endurtakið frá *til * að pm 3, s6, pm 4, *sláið upp á prjóninn, p2s*, endurtakið frá * til * að pm 1. Umf 4: Prjónið allar lykkjur s. Umf 5: pm 1, s6, pm 2, *p2s, sláið upp á prjóninn*, endurtakið frá * til * að pm 3, s6, pm 4, *p2s, sláið upp á prjóninn*, endurtakið frá * til * að pm 1. Umf 6: Prjónið allar lykkjur s. Endurtakið umf 3-6 fjórum sinnum = 16 umf með 1 þræði af ullargarni. Prjónið umf 3-6 einu sinni með þremur þráðum af mohairgarni = 4 umf. Prjónið umf 3-6 þrisvar sinnum með ullargarni = 12 umf. Prjónið umf 3-6 tvisvar með þremur þráðum af mohairgarni = 8 umf. Prjónið umf 3-6 tvisvar með ullargarni en í síðustu umf (6. umf) fellið af hliðarlykkjurnar báðu megin svona: (Færið pm á meðan þið prjónið) Fellið af 6 hliðarlykkjur, s3, pm 1, s30, pm 2, s3, fellið af 6 hliðarlykkjur, s3, pm 3, s30, pm 3, s3.

Bak: Prjónið nú 36 l á bakinu fram og til baka á hringprjónum með 3 þráðum af mohairgarni. Geymið hinar 36 l að framan á prjóninum. Umf 1: s3, pm 1, *sláið upp á prjóninn, p2s*, endurtakið frá * til * að pm 2, s3. Umf 2: Prjónið allar lykkjur brugðnar (b). Umf 3: s3, pm 1, *p2m, sláið upp á prjóninn*, endurtakið frá * til * að pm 2, s3. Umf 4: Prjónið allar lykkjur b. Prjónið umf 1-4 sjö sinnum = 28 umf. Fellið af að framan.

Framhlið: Prjónið netamynstrið eins og að aftan með 3 þráðum af mohairgarni. Prjónið umf 1-4 fimm sinnum = 20 umf nema í síðustu umf 4 (á röngunni), fellið af til að móta hálsmál svona: b13, fellið af 10 l á röngunni (brugðið), b13. Prjónið nú hvora öxl í sitt hvoru lagi svona: s3, *sláið upp á prjóninn, p2s*, endurtakið frá * til * fimm sinnum (réttan). Prjónið 2 brugðið saman (p2bs), allar lykkjur b. Prjónið nú umf 1-4 einu sinni = 4 umf. Fellið af á réttunni. Prjónið hina öxlina eins nema speglaða.

Pífur: Takið upp 164 l meðfram neðri kanti með einum þræði af mohairgarni og hringprjónum í stærð 5 (passið að taka báðar lykkjurnar upp, að framan og aftan). Umf 1: *b3, s1* endurtakið frá * til * alla umferðina. Umf 2: s yfir s og b yfir b. Umf 3: Takið upp lykkjur báðu megin við hverja s lykkju og prjónið s lykkjur í gegnum aftari lykkjuboga = b3 og s3 til skiptis. Umf 4: Eins og umf 2. Umf 5: Takið upp lykkjur á milli allra s lykkja og prjónið þær s í gegnum aftari lykkjuboga = b3 og s5 til skiptis. Umf 6: Eins og umf 2. Umf 7: Fellið af á réttunni, slétt yfir slétt og brugðið yfir brugðið.

Saumið axlirnar og gangið frá endum.